風水命理開運專家

		報章名稱：壹本便利刊登日期：2003年03月19日文章主題：霆鋒入院關楊受成事

　　最近「英皇」藝人喺呢個月相繼「入廠」，你都咪話唔邪！為咗解救至愛霆鋒仔於水深火熱之中，玄學家區仲德師傅山長水遠咁入去淺水灣，同英皇老闆楊受成間屋睇下風水。望望佢間金屋利唔利旗下藝人，點知真係有發現！好在區師傅話通通都可以化解。

‧霆鋒復出記招上，場外多個花籃突然倒下，確係有啲邪！不過，區師傅話霆鋒四、五月會當旺，無有怕！

楊受成大宅病星到
　　區仲德師傅：「呢間屋概大門坐東向西北，而主屋大門則喺正北位·今年啱啱有病符星到，影響到屋主，甚至佢下屬嘅健康，咁啱霆鋒、祖兒同陳冠希都係屬猴，一齊犯咗月太歲，更加容易染病，咪先後入醫院囉，不過，有得化解嘅！」

「天斬煞」襲英皇？
　　區師傅親身到灣仔英皇集團中心一眼就睇出有一個「天斬煞」影響咗英皇嘅風水，「英皇中心嘅大門同楊生間屋一樣係向北。但係灣仔呢面就啱啱有一個『天斬煞』影響到風水，但係種番啲植物就無也問題嘞！」

‧區師傅所講嘅天斬煞，因為風、陽光同水氣都從呢條史釗域道帶入英皇集團中心，令到英皇賺到錢之餘，亦惹是非病痛，但區師傅話只要喺大門右面宣傳牌下種一啲軟身、草類植物就可以化煞。

‧楊生間屋大門位在日間無陽光射到，原來屬陰煞，利做娛樂圈這種偏門生意，難怪英皇近年雄霸樂壇，搵大錢啦！

‧區師傅話：「門前水向下，啲水嚟得又急又快，可以喺屋嘅右邊種樹，減弱殺傷力。不過最好係種一、六或者八棵樹去擋，依家得兩、三棵就無咁好。」